LEER KEN BOOKMARK TAX & ACCOUNTING SPECIALISTS (BMTA)

By Bookmark Tax & Accounting Specialists is my doel om besighede en individue te bemagtig om met vertroue hul belasting- en finansiële besluite te neem. Daarom help ek individue en kleiner ondernemings om belasting eenvoudiger te verstaan, slimmer te beplan en hul besighede op ‘n gesonde finansiële grondslag te bou.

Belasting is die hart van my praktyk, met rekeningkunde as die hulpmiddel wat alles ondersteun. Ek werk graag een-tot-een met my kliënte, omdat elke besigheid ‘n unieke storie, droom en visie het. Wanneer ek jou leer ken, kan ek jou besigheid beter verstaan en jou met groter insig ondersteun. Van belastingopgawes, BTW-registrasies en belastingbeplanning tot boekhouding, die korrekte klassifikasie van transaksies en die opstel van finansiële state vir kleiner ondernemings, is my doel om orde, duidelikheid en gemoedsrus te bring.

Ek glo finansies hoef glad nie ingewikkeld te wees nie. Wanneer jy verstaan wat in jou besigheid aangaan, bestuur jy dit met groter wysheid en meer selfvertroue. My grootste dryfkrag is om kliënte te help om belasting op ‘n wettige en etiese manier te beplan, sodat hulle hul hulpbronne verstandig kan aanwend en meer kan belê in die groei van hul besigheid.

Die mens en hart agter BMTA

Ek het nog altyd ‘n liefde vir wiskunde, rekeningkunde en probleemoplossing gehad. Dit het my gelei na ‘n BCom-graad in Rekeningkunde, gevolg deur SAIPA-klerkskap en verdere studies in Internasionale Belasting. Hoewel my oorspronklike droom was om ‘n geoktrooieerde rekenmeester te word, het ek ontdek dat my ware passie belasting is en om mense daardeur te help. Hierdie passie het uiteindelik gelei tot die ontstaan van Bookmark Tax & Accounting Specialists.

Vir my gaan dit egter oor veel meer as belastingwetgewing en syfers. ‘n Belastingpraktisyn kry toegang tot van die mees persoonlike inligting oor ‘n persoon of besigheid. Daarom bou ek my praktyk op vertroue, eerlikheid en persoonlike verhoudings. Ek geniet dit om saam met kleiner ondernemings te werk, want wanneer ek jou besigheid verstaan, kan ek jou beter adviseer en saam met jou groei. As my kliënte floreer, is dit ook vir my ‘n groot sukses.

Ek verwelkom ook nuwe tegnologie en kunsmatige intelligensie as hulpmiddels wat administrasie eenvoudiger en meer akkuraat maak. Soos SARS tegnologie toenemend gebruik om prosesse te verbeter, glo ek dat die regte gebruik van hierdie hulpmiddels tyd bespaar, akkuraatheid verhoog en uiteindelik tot voordeel van my kliënte aangewend kan word.

Die Koninkryksimpak van BMTA

My geloof vorm die grondslag van hoe ek my besigheid bestuur. Daarom is etiek, integriteit en deeglikheid nie net professionele waardes nie; dit is die manier waarop ek elke dag werk.

Wanneer ons met belasting werk, werk ons met verantwoordelikheid. Die Bybel leer ons om aan die keiser te gee wat die keiser toekom, en daarom glo ek belasting moet altyd wettig, eerlik en met integriteit hanteer word. Goeie belastingbeplanning gaan nie daaroor om verantwoordelikhede te vermy nie, maar om die wet verstandig toe te pas en goeie rentmeesters van ons finansies te wees.

My gebed is dat mense nie net ‘n professionele belastingpraktisyn sal ontmoet wanneer hulle met BMTA werk nie, maar iemand wat werklik omgee. Ek wil ‘n verskil maak deur mense met respek, eerlikheid en wysheid te dien, sodat hulle met groter vertroue hul besighede kan bestuur en elke dag die regte ding sal doen. Ek glo wanneer ons met integriteit optree, bou ons nie net sterker besighede nie, maar dra ons ook by tot ‘n beter Suid-Afrika. Ek sien uit om te sien hoe die Here hierdie besigheid in die toekoms gaan gebruik vir die uitbreiding van Sy Koninkryk.